ویمن چیمبر آف کامرس اینڈ انڈسٹری میں سموگ کے حوالے سے آگاہی سیشن کا انعقاد
ڈی جی خان ویمن چیمبر آف کامرس اینڈ انڈسٹری (DGKWCCI) کی جانب سے سموگ کے خطرناک اثرات اور اس سے بچاؤ کے حوالے سے ایک اہم آگاہی سیشن کا انعقاد کیا گیا۔ اس سیشن کا مقصد کاروباری خواتین اور عام عوام میں سموگ کے نقصانات اور احتیاطی تدابیر کے بارے میں شعور بیدار کرنا تھا۔
سیشن کی قیادت چیمبر کی فاؤنڈیشن صدر محترمہ فرح بشیر نے کی، جبکہ صدر نورالصبا، نائب صدر عائشہ فاطمہ اور دیگر ممبران نے اس موقع پر بھرپور شرکت کی۔
پبلک ہیلتھ اسپیشلسٹ ڈاکٹر منزہ بتول نے سموگ کے صحت پر مضر اثرات اور اس سے بچاؤ کے طریقوں پر روشنی ڈالی۔ انہوں نے کہا کہ سموگ سے سانس کی بیماریوں، آنکھوں کی جلن اور دیگر مسائل کا خطرہ بڑھ جاتا ہے۔ عوام کو چاہیے کہ وہ احتیاطی تدابیر اختیار کریں تاکہ اپنی اور اپنے خاندان کی صحت کو محفوظ رکھا جا سکے۔
ڈاکٹر منزہ بتول نے اہم نکات پیش کیے:
گھروں تک محدود رہنے کی کوشش کریں اور غیر ضروری طور پر باہر نہ نکلیں۔
باہر جانے کی صورت میں ماسک کا استعمال یقینی بنائیں۔
صاف ستھری ہوا کے لیے درخت لگانے اور آلودگی کم کرنے پر زور دیں۔
پانی کا زیادہ استعمال کریں اور قوت مدافعت کو مضبوط بنانے والی غذا کا انتخاب کریں۔
محترمہ فرح بشیر نے اپنے خطاب میں کہا کہ ویمن چیمبر نہ صرف خواتین کی معاشی ترقی کے لیے کام کر رہا ہے بلکہ ان کی صحت اور تحفظ کو یقینی بنانے کے لیے بھی سرگرم ہے۔ محترمہ نورالصبا نے مزید کہا کہ ایسے آگاہی سیشنز خواتین کو درپیش چیلنجز سے نمٹنے میں مدد فراہم کرتے ہیں، جبکہ عائشہ فاطمہ نے اس پروگرام کو ایک مثبت قدم قرار دیا۔
اس سیشن کے اختتام پر شرکاء نے اس مہم کو سراہا اور مزید ایسے اقدامات کی ضرورت پر زور دیا۔ یہ پروگرام سموگ کے اثرات سے نمٹنے کے لیے ایک اہم پیش رفت ثابت ہوا۔